میڈیا کی معروف شخصیت ڈاکٹر عمیر ہارون کو پاکستان ایکسیلنس ایوارڈ 2026 عطا

کراچی: پاکستان ایکسیلنس کلب نے حکومتِ سندھ کے محکمۂ ثقافت اور محکمۂ کھیل کے اشتراک سے معروف میڈیا پروڈیوسر اور میڈیا ایگزیکٹو ڈاکٹر عمیر ہارون کو پاکستان ایکسیلنس ایوارڈ 2026 سے نواز دیا۔ انہیں یہ اعزاز ’’میڈیا پروڈکشن اور عالمی ثقافتی سفارت کاری میں نمایاں وژنری شخصیت‘‘ کے زمرے میں دیا گیا، جو پاکستان کے میڈیا منظرنامے کو نئی جہتیں دینے اور عالمی سطح پر ملکی ثقافت کو متعارف کرانے کے لیے ان کی خدمات کا اعتراف ہے۔
دسویں سالانہ پاکستان ایکسیلنس ایوارڈز کی پُروقار تقریب 24 اکتوبر 2026 کو کراچی کے موون پک ہوٹل میں منعقد ہوئی، جس میں سفارت کاروں، صوبائی وزرا، کاروباری شخصیات، ماہرینِ تعلیم اور شوبز انڈسٹری کے نامور فنکاروں نے شرکت کی۔
پاکستان ایکسیلنس ایوارڈز ملک کا ایک معتبر پلیٹ فارم ہے، جس کے ذریعے سیاست، کاروبار، میڈیا اور تعلیم سمیت مختلف شعبوں میں غیر معمولی خدمات انجام دینے والی شخصیات کی صلاحیتوں، جدت اور قیادت کو سراہا جاتا ہے۔ ان اعزازات کا مقصد پاکستان کا مثبت تشخص اجاگر کرنا اور نئی نسل کو عالمی سطح پر نمایاں کامیابیوں کے لیے متحرک کرنا ہے۔
تقریب میں ڈاکٹر عمیر ہارون کے ساتھ شوبز اور میڈیا کی دیگر معروف شخصیات کو بھی اعزازات دیے گئے۔ لیجنڈ اداکار مصطفیٰ قریشی کو خصوصی لائف ٹائم اچیومنٹ ایوارڈ جب کہ میڈیا شخصیت ریحام خان کو براڈکاسٹ صحافت اور سماجی بہبود کے شعبوں میں خدمات کے اعتراف میں ایوارڈ دیا گیا۔ اسی طرح فیروز خان، ثنا جاوید، عدیل حسین اور سارہ خان کو پاکستانی ٹیلی ویژن اور فلمی صنعت میں نمایاں کارکردگی پر اعزازات سے نوازا گیا۔
ڈاکٹر عمیر ہارون دو دہائیوں سے زائد عرصے پر محیط کیریئر کے حامل ٹی وی پروڈیوسر، ڈائریکٹر اور سینئر میڈیا ایگزیکٹو ہیں۔ انہیں بین الاقوامی نشریاتی شعبے میں بھی نمایاں مقام حاصل ہے۔ وہ انٹرنیشنل اکیڈمی آف ٹیلی ویژن آرٹس اینڈ سائنسز، جو ایمی ایوارڈز سے وابستہ عالمی ادارہ ہے، کے جیوری رکن ہونے کا اعزاز رکھتے ہیں، جہاں وہ عالمی سطح پر پاکستان کی نمائندگی کررہے ہیں۔
ڈاکٹر عمیر ہارون نے تخلیقی صلاحیتوں اور میڈیا مینجمنٹ کو یکجا کرتے ہوئے مقامی ٹیلی ویژن پروڈکشن کو نئی جہتیں دینے میں کردار ادا کیا ہے۔ ان کے مطابق میڈیا محض تفریح کا ذریعہ نہیں بلکہ مختلف قوموں کے درمیان رابطے، ثقافتی ہم آہنگی اور مثبت سفارت کاری کا مؤثر وسیلہ بھی ہے، جس کے ذریعے پاکستان کے ثقافتی ورثے اور تخلیقی صلاحیتوں کو عالمی ناظرین تک پہنچایا جاسکتا ہے۔
ایوارڈ وصول کرنے کے بعد ڈاکٹر عمیر ہارون نے اظہارِ تشکر کرتے ہوئے کہا کہ یہ اعزاز اس حقیقت کا اعتراف ہے کہ میڈیا مختلف قوموں کے درمیان پل کا کردار ادا کرسکتا ہے۔ انہوں نے کہا کہ وہ ملک کے میڈیا منظرنامے کو مزید وسعت دینے اور عالمی سطح پر پاکستان کی آواز کو مؤثر انداز میں پہنچانے کے لیے اپنا کردار جاری رکھیں گے۔
ڈاکٹر عمیر ہارون نے پاکستان ایکسیلنس کلب کے چیئرمین اور تقریب کے چیف آرگنائزر حمید بھٹو کا خصوصی شکریہ ادا کیا اور قومی صلاحیتوں کو خراجِ تحسین پیش کرنے کے لیے باوقار پلیٹ فارم فراہم کرنے کی ان کی کاوشوں کو سراہا۔