پاکستان میں یوٹیوب پر روزانہ 56 کروڑ ویڈیوز دیکھے جانے کا انکشاف

اسلام آباد: قومی اسمبلی کی قائمہ کمیٹی برائے آئی ٹی کا اجلاس امین الحق کی زیرصدارت ہوا، جس میں چیئرمین پاکستان ٹیلی کمیونیکیشن اتھارٹی (پی ٹی اے) حفیظ الرحمٰن نے ملک میں سوشل میڈیا کے استعمال سے متعلق تفصیلات پیش کیں۔

چیئرمین پی ٹی اے کے مطابق پاکستان میں ٹک ٹاک اور واٹس ایپ کے صارفین کی تعداد 10، 10 کروڑ ہے جب کہ یوٹیوب استعمال کرنے والے پاکستانیوں کی تعداد 9 کروڑ 60 لاکھ ہے۔

حفیظ الرحمٰن نے بتایا کہ پاکستان میں یوٹیوب پر روزانہ 56 کروڑ ویڈیوز دیکھی جاتی ہیں اور دنیا میں یوٹیوب ویڈیوز دیکھنے والوں میں پاکستان سرفہرست ہے۔

ان کے مطابق پاکستانی صارفین واٹس ایپ کے ذریعے روزانہ ایک ارب کالز کرتے ہیں جب کہ روزانہ 12 ارب پیغامات بھی ارسال کیے جاتے ہیں۔