کراچی ایسٹ میں پولیو کا کیس، رواں سال ملک میں تعداد سات ہوگئی

پولیو کے خاتمے کے لیے قائم نیشنل ایمرجنسی آپریشنز سینٹر نے پیر کو بتایا کہ کراچی کے ضلع ایسٹ سے تعلق رکھنے والے چھ ماہ کے بچے میں پولیو وائرس کی تصدیق ہوئی ہے۔

یہ تقریباً دو سال بعد کراچی سے سامنے آنے والا پہلا کیس ہے۔ رواں سال کے سات کیسز میں سے پانچ خیبر پختونخوا اور دو سندھ سے رپورٹ ہوئے۔

اس سال چار انسداد پولیو مہمات میں ساڑھے چار کروڑ سے زائد بچوں کو قطرے پلائے گئے۔ اگلی ملک گیر مہم 2 سے 8 نومبر تک چلے گی جس میں 97 اضلاع کے تقریباً دو کروڑ 40 لاکھ بچوں کو ہدف بنایا گیا ہے۔